ضـبـــان (معلومات شاملة )
--------------------------------------------------------------------------------
بسم الله الرحمن الرحيم
ضـبـــان (معلومات شاملة )
--------------------------------------------------------------------------------
الحمد لله رب العلمين ،والصلاة والسلام على أشرف الانبياء والمرسلين، نبينا محمد وعلى آله وصحبه اجمعين،
وبعد::::
البــدايـــة::
تتجه هذه الأيام قوافل الصيد باتجاه الصحارى للبحث عن الضب، الذي يعتبر صيده من أفضل أنواع الصيد وأمتعها في المملكة العربية السعودية، والهدف من صيده أكله طبعاً، ولكن الأغلب منهم دائماً يبحث عن المتعة في مطاردته..
معلومات عن الضب::
اسم الضب : يسمى ذكر الضب (عير) وخاصه اذا كان سافط العداد في الكبر والأنثى اسمها (ضبه) و (مكون) وولدهم الصغير اسمه (سحيلي) يعني الابو ينادونه ربعة (ابو سحل) اما البنت فاسمها (ضبيبة)
لكن صعب جدا في علم الضببه انك تعرف الذكر من الانثى وخاصه اذا كانت الضببة توها في مقتبل العمر الا عاد اذا بغيت تخربها وتسوي حركات أحم أحم فهذا شي ثاني !!
راس الضب باللي فيه::
دايم (العير) يكون في راسه ورقبته حدود سود وبعضهم يحسبها لحية من بعيد وهذي ميزة الذكر الشايب ، وسنون الضب قوية مع انها صغيره لكن اذا عضــــك وانت تحفره عليه فاحسن حل انك تنخج خشته بعود او تكب عليه فلفل الين يعطس وتطلع يدك منه ، ودايم تلاحظ الضب يشرب هواء ثم يبخه بقوه وخاصه اذا كان مطرود ومقفله معه ، اما عيونه فهي غالبا ما تكون حمر وصبياته عسليه وله اذان على شكل خياشيم وسمعه احيانا يكون الله بالخير لأنك ترمي عليه بالشوزن وتسف من عنده وما جاب خبرك بس عنده حاسه قويه بمجرد انه يلمح قرطاسه تدربى يجحر وما تشوف الا عكرته سابقته
بطن وأحشاء الضب::
آآآآآآه هنا مربط الضب هنا لندن قصدي هنا كلش المكينه والقير ونبدا بالمصارين اللي مالها داعي انك تخليها فيه بعد الذبح اكتم نفسك واقطعها وانطلها بعيد واهم شي في البطن هو السلايق هي بمثابة الكنز الثمين في احشاءه واذا كنت محظوظ بضب مربع ومزغدد من الربيع فتبي تلقى سلايقه مابقى إلا تطلع مع اذانه من كبرهن وطولهن وفيه شي لازم تنتبه له في بطنه اللي هو المراره وهي عباره عن تفيفيخه صغيره لكن اذا انفقعت في البطن فسدت اللي فيه اقطعها بشويش واغسل البطن عقبها
عكرة الضب::
هنا الزبده وهنا مطلب الضب وهالعكره تتكون من واحد وعشرين عقدة تقريبا وتعتبر سلاحه في وقت الزنقه وضربة العكره تسمى( لسبه) مشتقه من لسب يلسب لسباً اي رصعه و فيه طريقة ممتازه لتحريك الضب اذا شبص مكانه وهي انك تحرش عكرته وتدغدها مع جوانبها وبكذا يبي يمشي طبلونه في أي اتجاه تبيه ، بالاضافه الى ان العكره تعتبر اطعم مافي الضب لدرجة ان بعضهم اذا صاده يقطع عكرته ويطلقه الين يطلع شكله كنه موتر بدون نسافه!!
جلد الضب::
جلده طبعا احرش وخشن ويستخدمون جلده في تزيين النعال والشنط وابواك الفلوس ، وميزة جلده انه ما يتأثر بالماء هذا غير تحمله للحرارة ..
بيض الضبة::
يقولون ان الضبه تبيض حول سبعين بيضة او اكثر ويكون بيضها في حجم (حلاو الصعو) للي يعرفها او كبر المصاقيل وطبعا الضبه ما ترجن على بيضها لكنها تدفنه في مكان معين او مثلث الين يفقس ويبي له حول الاربعين يوم عشان يفقس يعني نفاسية بالضبط مثل الحريم ويقال ان الأم تاكل عيالها اذا طلعوا من البيضه الا اللي توفق وعـــطاه صحراء قبل ما تطيح فيه ....
حياته وطباعــــــــــــــه::
يقولون ( ايه لزقها في يقولون ) ان عمر الضب ياصل 300 سنه ؟ او اكثر والضب معروف عند الناس بطول العمر، هذا غير انه يبطي في موته لدرجة ما نتصورها واغلبية اللي ذبحوه وقطعوه وفي القدر سقطوه لقو بعض اجزاءه تتحرك ؟ وقالوا الاولين في احد امثلتهم (لزق المثل في الاولين ) يموت الضب وعكرته تلسب ، كنايه عن صعوبة موته ، ومن أطباعه انه ضعيف الذاكره وعشان كذا تلقاه ما يبعد عن جحره لكن اذا داخ مع الربيع وخربها بعيد عن الجحر وطردته فهو يبي يسحب السيفون على جحره وارض الله واسعه، ومن اطباعه انه ما يتواطن مع الورل وقبل وهم هواش ولعنة خيّر مع انهم يتشابهون شوي في الشكل لكن الضب يفضل العقرب على هالحيوان الزاحف المعصقل وبينه وبين العقرب صداقه ومصالح فهو يسكنها جحره مقابل انها تقرص كل من حاول يدخل يده يتلمس عكره، ومن طباعه ايضا انه فيه شوفة نفس وكبر وخاصه وقت الخضره والعشب وتشوفه يختال في مشية يسحب عكرته ويمشي بشكل متغنج ، ايضا له قدره عجيبه في صبره عن الاكل فتلقاه يجلس في الجحر كم شهر بــــدون اكل هذا غير انه ما يحتاج للماء لأن جلده خالي تماما من الكحول قصدي من المسام ..
طرق صيد الضب::
له كم طريقة واولها انك تجيب المسحاة والعتله وتبدا تحفر جحره لكن مشكلة جحره انه يكون طويل وعميق ومتعرج وهالطريقة انقرضت هالحين لكثرة العجازين في هالوقت ، والطريقة الثانيه هي انك (تغرّقــه ) بالماء الين يطلع وبعض الضبان هالحين تنبه للطريقه هذي وحط له خزان تصريف في جحره يعني يبي يقضي الماء ما طلع ، والطريقة الثالثه انك تشكمنه والمعروف انها مضره للضب وتفسد لحمه ، وفيه طريقه (المكناس ) وهو عصى تشبه العتلة وراعي المكناس اذا شاف الضب خارط الريوس في جحره يختل له بشويش ويمشي على اطراف اصابعه و يطعنه طعنة غدر..
وهذي قصيدة عن الضبان ...
أواه يا ضب علــــى الطعــس مغبـــون = يبكي قهر من شوف فرقا مكـونه
شـاف الجحر فاضي بلاطعم او لـــــون = شافـه ودمعـــه غارقٍ في عيونـه
ما صـــدق عــيونه الا كيف وشـلــــون =عقب الرفاقـــــه والمحبه تخــــونه
قام يـتـــقلب في الجحر تقل مجنـــون = يقلب تــراب الــغضي ويصــــــونه
يشكي على الحرمل مواجيع وشطـون = ويلــسب لواهيب الغرام وديــــونه
ويسحب من اللوعات انفاس وشجـــون = ويجلس طوال الليل تسهر جفـــونه
تسمع وشيشه كن صدره به اطــــعون = يــجاذب انفاس الوله في طــعونه
هــنـــيـكــم يالـلي بـــذا البر تـلـهـون = ما تـــعرفون العشق شكله ولونـه
يالحـــــب مثل السيف لا جاك مسـنون = يحمل معه اوجــاع ذل ومـهــــونـه
ياعل جــحر في نـقـا الــبر مسكــون = يســـقيه ربي من صوادق مزونــــه
حيثه سكــــن في داخله ضب مزيــون = ضب جـــــمع بالزين حســن وليونه
هــذا ولـيفي مــــغرمٍ فيه مفــــــتون = وما شفـــــت طعمٍ للبراري بـدونــه
:: طريقة إعداد وجبة الضبـان ::
المقادير :
1ـ مكون<<== (ضبه يعني) لازم تكون طيبة ويفضل أن تكون مربعة وعضودها مليانة وعكرتها مدورة وفيها بيض ..
2ـ فص بصل مقطوع دواوير
3 ـ ملح
4ـ بقدونس ومايحتاج بيض إذا كانت المكون فيها من الأساس ..
الطريقة :
1ـ تقطع المكون أرباع أو اثلاثاً وتحمس جيداً حتى يصبح لونها بني غامق ..
2ـ بعد ذلك يتم إضافة الملح والخل والزعفران حسب الرغبة .. وتترك المكون تغلي لمدة ثلاث طعشر ساعة إذا كان القدر قديم أ ومنبعجة طباقته يعني يهرب بخار ..
أو لمدة تسع ساعات إذا رصيت الغطاء بالاستبنة أو ببلكة ..
أو لمدة خمس طعشر دقيقة إذا كان معك قدر كاتم ، أوأربع دقايق إذا صرت تطبخ في كاتم وفي عز القايلة والسموم ، بعد ذلك أضف البقدونس الخضراء المهروسة علــى الطبق وبالهناء والشفاء
بس انتبه يمكن تصير المكون مابعد ماتت ؟؟ او فيها عرق حياة وتفرم البقدونس أقول يمكن سبحان الله ..
الضبان بعد إخراجها من الكاتم للتنظيف
بعد إخراج القدر ورفعه عن النار ... نبدأ بإخراج الضبان من القدر الكاتم على صحن مستقل كي نبدا بتقشير الجلد ...
سلخ الجلد من العكرة طريقة نزع الجلد كالتالي نمسك العكرة
نقطعها بالسكين من الوسط بضغط خفيف كي لانخرب اللحم
العكرة بعد سلخ الجلد ... سيكون شكل العكرة واليد (( اليد أو الفخذ كلاهما متشابهان )) ...
بعدها سينتج عنها مجموع من لحمة الضب جاهزة للطبخ بعد أن قمنا بنتظيفها من الجلد والوسخ العالق
بعدها نحطها بالكاتم مع الرز والوقت مابين 20 الى 25 دقيقة بعد التستسة وسيكون الناتج هكذا .. وبالهناء والعافية ..
وفي الختام . . .أتمنى أن يكون الموضوع نال على حسن إعجابكم واستحسانكم . . .
ولا يسعني إلا أن أتقدم بجزيل الشكر مقدماً لكل من سيعلق على الموضوع فأهلا بكم وبردودكم . . .
وتقبلوا أجمل التــحــايـــا من محبــكـــم:ابوفيصل
منقول
الإثنين مايو 12, 2008 5:23 am